सोलापूर ‘शहर मध्य’ मध्ये आता या भाईंची एन्ट्री ; राष्ट्रवादीचे जुबेर बागवान निवडणूक लढवण्यावर ठाम
सोलापूर : सर्वाधिक मुस्लिम समाजाची मतदार संख्या असलेल्या शहर मध्य या विधानसभा मतदारसंघात मुस्लिम नेत्यांमधून इच्छुकांची संख्या सर्वाधिक आहे. एम आय एम कडून फारूक शाब्दी यांची उमेदवारी यापूर्वी जाहीर झाली आहे परंतु काँग्रेस आणि शरदचंद्र पवार राष्ट्रवादी काँग्रेसच्या मुस्लिम कार्यकर्त्यांनी उमेदवारी देण्यासाठी जोर लावला आहे.
एकीकडे असे असताना दुसरीकडे राष्ट्रवादी काँग्रेस अजित पवार यांच्या गटाचे शहर कार्याध्यक्ष जुबेर बागवान हे सुद्धा या मतदारसंघातून इच्छुक असल्याची माहिती असून उमेदवारी देण्यासाठी बागवान समर्थक शिष्टमंडळाने उपमुख्यमंत्री अजित पवार आणि प्रदेशाध्यक्ष सुनील तटकरे यांची भेट घेऊन मागणी केली या शिष्टमंडळात अल्पसंख्याक शहर जिल्हाध्यक्ष अमीर शेख, वाहतूक सेल अध्यक्ष इरफान शेख, शहर मध्य विधानसभा अध्यक्ष अलमेराज आबादीराजे, अल्पसंख्यांक दक्षिण विधानसभा कार्याध्यक्ष मुहिज मुल्ला, सोलापूर शहर युवक उपाध्यक्ष सरफराज बागवान, वाहतूक आघाडी प्रसिद्ध प्रमुख इमरान रंगरेज, रहमान आळंदकर, शुभम खानज, रुपेश सुंडार उपस्थिती होती. यावेळी अजित पवार यांनी येणाऱ्या एक दोन दिवसात शहर मध्य मतदारसंघ आपल्याकडे खेचून घेऊ कामाला लागा असे सांगितले असल्याचे समजले.
2019 च्या विधानसभा निवडणुकीवेळी जुबेर बागवान यांनी राष्ट्रवादी काँग्रेसकडून उमेदवारी अर्ज भरला होता मात्र काँग्रेसच्या प्रणिती शिंदे यांच्यासाठी त्यांनी माघार घेतली होती. जुबेर बागवान यांनी राष्ट्रवादी काँग्रेस पक्षाचे युवक अध्यक्ष पद अनेक वर्ष सांभाळले, सध्या ते शहर कार्याध्यक्ष म्हणून काम करत आहेत. शहराध्यक्ष संतोष पवार यांच्या जोडीने अजित पवारांच्या राष्ट्रवादीची शहरात चांगली बांधणी केली आहे. अजित पवारांचे सोलापुरातील विश्वासू म्हणून त्यांची ओळख आहे.
सोलापुरात अजित पवारांच्या माध्यमातून सोलापूर शहरात सुमारे 20 कोटींचा निधी आणून विकास कामे केली आहेत. कोरोना काळात त्यांनी मार्केट यार्डातील हमाल कामगारासाठी राज्य शासनाकडून सहा हजार रुपये मदत म्हणून मिळवून दिले. कोरोनाचा कठीण काळात अनेक गोरगरिबांना हातभार लावले.
अजित पवारांचा निष्ठावंत कार्यकर्ता, मुस्लिम समाजाच्या विविध प्रश्नांवर आवाज उठवणारा नेता, अनेक सामाजिक उपक्रमांमध्ये सहभाग, केवळ मुस्लिमच नाही तर सर्वच समाजाला सोबत घेणारे व्यक्तिमत्व या ओळखीच्या जोरावर जुबेर बागवान यांनी सोलापूर शहर मध्य या मतदारसंघात दादांकडे उमेदवारी मागितली आहे उमेदवारी मिळाल्यास निश्चितच या मतदारसंघात परिवर्तन घडवू असा विश्वास बागवान यांनी व्यक्त केलाय.
