अन्यथा… संपूर्ण शास्त्रीनगरचे दूषित पाणी महापालिकेमध्ये आणून टाकेन ; नागरिक वैतागले !
सोलापूर महानगरपालिका क्षेत्रातील शास्त्रीनगर भागातील हनफिया मस्जिद जवळ तसेच दत्त मंदिर, सोमपा दवाखाना, हनफिया मशीद पूर्ण गल्ली डॉ. अन्सारी चौक व्हालीबॉल ग्राऊंड या परिसरात पिण्याच्या पाण्यामध्ये गढूळ आणि दूषित पाणी येत असल्यामुळे नागरिकांना अनेक रोगराईला सामोरे जावे लागत आहे.
यामुळे गोरगरीब जनतेचे जीवन धोक्यात आले आहे. याबाबत संबधित अधिकाऱ्यांना प्रत्यक्ष भेटून फ़ोनवरुन वारंवार कळविले असता याबाबत कोणतीही कारवाई झालेली नाही तसेच पिण्याचे पाणी हे अत्यंत कमी दाबाने येत असून रहिवाशांना मुबलक पाणी मिळत नाही.
सोलापूर काँग्रेसचे शहर मध्य युवक अध्यक्ष वाहिद विजापूरे यांनी दूषित पाण्यासह महिलांना घेऊन महानगरपालिका गाठली. त्या ठिकाणी महापालिका प्रशासनाला निवेदन देण्यात येऊन त्या दूषित पाण्याच्या बाटल्या दाखवण्यात आल्या. यावेळी आपल्या मागण्यांचे निवेदन देण्यात आले.
या निवेदनाद्वारे विनंती करत आहोत की, एकूणच परिस्थितीचा गांभीर्याने विचार करून शास्त्रीनगर भागात होणारा गढूळ पाणीपुरवठा व कमी दाबाने येणारे पाणी याची सखोल चौकशी करून संबंधित अधिकारी व कर्मचाऱ्यावर कारवाई करावी आणि पाणीपुरवठा स्वच्छ आणि सुरळीत करावा अशी मागणी करण्यात आली.
शास्त्रीनगर भागातील पाण्याची समस्या अनेक दिवसांपासून आहे वारंवार निदर्शनास आणून अधिकाऱ्यांना दाखवूनही हा प्रश्न सुटत नाही आज आम्ही निवेदन दिले आहे. येणाऱ्या काही दिवसात हा प्रश्न नाही सुटल्यास संपूर्ण शास्त्रीनगर मधील गढूळ पाणी आणून महानगरपालिकेमध्ये टाकेल असा इशारा बिजापुरे यांनी दिला.
