मोहिते पाटील- शिंदे घराण्याचे ऋणानुबंध भाजपच्या रामाला डोकेदुखी ; आमदार प्रणिती शिंदे यांच्यासाठी मोहिते पाटील ‘प्लस पॉईंट’
सोलापूर : सोलापूर जिल्ह्याचे राजकारण ज्यांच्या नावावर चालते ते मोहिते पाटील घराणे आणि सोलापूर शहरात यांचा दबदबा आहे अशा सुशीलकुमार शिंदे या दोन्ही कुटुंबियांचे पुन्हा ऋणानुबंध अधिक घट्ट झाले आहेत. हे निश्चितच भाजपचे उमेदवार राम सातपुते आणि रणजितसिंह निंबाळकर यांच्यासाठी डोकेदुखी ठरणार आहे तर काँग्रेसच्या उमेदवार प्रणिती शिंदे यांच्यासाठी मात्र मोहिते पाटील हे प्लस पॉइंट असल्याचे बोलले जाते.
एकाच वेळी राज्याचा मुख्यमंत्री आणि राज्याचा उपमुख्यमंत्री सोलापूर जिल्ह्याने महाराष्ट्राला दिला आहे तत्कालीन मुख्यमंत्री काँग्रेसने ते सुशीलकुमार शिंदे आणि तात्कालीन उपमुख्यमंत्री राष्ट्रवादीचे ज्येष्ठ नेते विजयसिंह मोहिते पाटील या दोन नेत्यांनी एकेकाळी संपूर्ण सोलापूर जिल्हा चालवला आहे. जरी हे दोन्ही नेते वेगवेगळ्या पक्षात असले तरी या दोघांमध्ये तेवढाच समन्वय होता त्यावेळी सोलापूर जिल्हा हा काँग्रेस आणि राष्ट्रवादीचा बालेकिल्ला म्हणून ओळखला जायचा नंतर सोलापूरचे राजकारण बदलत गेले. 2009 च्या विधानसभा निवडणुकीत विजयसिंह मोहिते पाटील यांचा पराभव झाला. 2014 च्या लोकसभा निवडणुकीत काँग्रेस नेते सुशीलकुमार शिंदे यांचाही पराभव झाला. जिल्ह्याची सत्ता समविचारी आघाडीच्या ताब्यात गेली नंतर अशा घडामोडी घडल्या की विजयसिंह मोहिते पाटील यांना भाजपमध्ये जावे लागले परंतु सुशीलकुमार शिंदे काँग्रेसमध्येच ठाम राहिले.
सोलापूर जिल्ह्याच्या ग्रामीण भागात मोहिते पाटील गटाची मोठी ताकद आहे. सोलापूर शहरात ही मोहिते पाटील गट पाहायला मिळतो. मागील पाच वर्ष भाजपमध्ये राहिलेले मोहिते पाटील घराणे यंदा लोकसभा निवडणुकीत धर्यशील मोहिते पाटील यांना उतरवण्याचा मनोदय केला होता परंतु भाजपने त्यांच्या आशेवर पाणी फेरले माढयाच्या शिंदे घराण्याच्या जोरावर त्यांनी पुन्हा रणजितसिंह निंबाळकर यांना उमेदवारी दिली पण आपला माणूस म्हणून माढा लोकसभा मतदारसंघात ओळख झालेल्या धर्यशील मोहिते साठी कार्यकर्ते धावले. काही होऊ दे यंदा तुतारी वाजवायचीच असा निश्चय केला शरद पवार यांच्या उपस्थितीत बैठक ठरली त्या बैठकीला काँग्रेस नेते सुशीलकुमार शिंदे यांनाही निमंत्रण देण्यात आले. विजयसिंह मोहिते पाटील, शरद पवार, सुशीलकुमार शिंदे या तिन्ही नेत्यांमध्ये बैठकी झाली. ही राजकीय घडामोडी सोलापूर जिल्ह्यासह पुणे व सातारा जिल्ह्यात अनेक समीकरणे बदलणारी होती. ती बैठक सोलापूरच्या काँग्रेसला ताकद देणारी ही होती.
यानंतर मंगळवारी धैर्यशील मोहिते पाटील यांचा अर्ज भरण्याचे ठरले जिल्हाधिकारी कार्यालय सुशीलकुमार शिंदे यांच्या घराच्या केवळ शंभर मीटर अंतरावर त्यामुळे मोहिते पाटील यांना जनवात्सल्य निवासस्थानी दुपारच्या जेवणाचे निमंत्रण दिले, यात सध्या सुशीलकुमार शिंदे यांच्याकडे असलेल्या चाणक्य डोक्याच्या हसापुरे यांचा रोल महत्त्वाचा ठरला.
आमदार रणजितसिंह मोहिते पाटील वगळता संपूर्ण मोहिते पाटील घराणे सुशीलकुमार यांच्या निवासस्थानी आले. अतिशय कौटुंबिक वातावरणात आदरातिथ्य करण्यात आले. शिंदे यांचे संपूर्ण कुटुंब मोहिते पाटील कुटुंबाच्या स्वागताला होते. या बैठकीनंतर मोहिते पाटील आणि शिंदे घराण्याचे ऋणानुबंध अधिकच जुळण्याचे पाहायला मिळाले याचा फायदा निश्चितच प्रणिती शिंदे यांना होणार असून यामुळे काँग्रेसची सोलापूर लोकसभा मतदारसंघात ताकद वाढली हे कोणालाही नाकारता येणार नाही.
