महादेव कोगनुरे व देवेंद्र फडणवीस यांची भेट ; बंद दाराआड चर्चा, कोगनुरे यांच्या मनात चाललंय तरी काय?
महाराष्ट्र राज्याचे उपमुख्यमंत्री देवेंद्र फडणवीस यांची एम के फाउंडेशनचे संस्थापक अध्यक्ष तथा सागर सिमेंटचे मुख्य व्यवस्थापक महादेव कोगनुरे यांनी सोमवारी हॉटेल बालाजी सरोवर येथे भेट घेतली. यावेळी त्यांच्यात बंद दाराआड बराच वेळ राजकीय चर्चा झाली. या भेटीची सोशल मिडीयावरुन चर्चा होत आहे. यामुळे महादेव कोगनुरे हे भाजपात प्रवेश करणार की काय ? याची चर्चा आता एम के फाउंडेशन च्या कार्यकर्त्यांतून सुरु आहे.या चर्चेमुळे महादेव कोगनुरे यांच्या कार्यकर्त्यांचा उत्साह मात्र अधिकच वाढला आहे.
कारण गेल्या अनेक दिवसांपासून महादेव कोगनुरे यांच्या भुमिकेकडे संपूर्ण दक्षिण सोलापूर तालुक्याचे लक्ष लागून राहिले होते.
मागील काही दिवसात सोलापूर लोकसभा महाविकास आघाडीच्या उमेदवार आमदार प्रणिती शिंदे व महायुतीचे उमेदवार आमदार राम सातपुते या दोघांनीही महादेव कोगनुरे यांच्या घरी जाऊन सदिच्छा भेट घेतली होती. यामुळे कोगनुरे हे काय भुमिका घेणार याची उत्सुकता कार्यकर्त्यांना लागून राहिली होती. त्यातच पुन्हा एकदा राज्याचे उपमुख्यमंत्री देवेंद्र फडणवीस व महादेव कोगनुरे यांच्यात बंद दाराआड राजकीय चर्चेने एम के फाउंडेशनच्या कार्यकर्त्यांचा उत्साह पुन्हा एकदा शिगेला पोहचला आहे.
