रूपाभवानी स्मशानभूमीतील विद्युत दाहिनी अखेर पूर्ववत सुरू ! उद्योजक केतन वोरा यांच्या प्रयत्नांना यश
सोलापूर : बालाजी अमाईन्सच्या वतीने एक कोटी 27 लाख रुपये सीएसआर निधीतून रूपा भवानी स्मशानभूमीत बसविलेल्या विद्युत दाहिनीच्या दुरुस्तीचे काम पूर्ण झाले आहे. अखेर ही विद्युत दाहिनी पूर्ववत सुरू करण्यात आली आहे.
सोलापूर महापालिका प्रशासनाच्या
उदासीनतेमुळे विद्युत दाहिनी तांत्रिक बिघाडामुळे बंद असल्याचा आरोप करत महापालिकेने तत्काळ विद्युत दाहिनीची तांत्रिक दुरुस्ती करून नागरिकांची होणारी गैरसोय टाळावी तसेच दुरुस्ती कामासाठी महापालिकेने यापुढे मक्तेदार नेमावा, अशी मागणी समाजसेवक तथा उद्योजक केतन वोरा यांनी मागील महिन्यात केली होती. महापालिका प्रशासनाने कार्यवाही करून ही विद्युत दाहिनी पूर्ववत सुरू केली. नागरिकांची गैरसोय होऊ नये म्हणून महापालिकेने विद्युत दाहिनी दुरुस्तीसाठी एका मक्तेदारावर जबाबदारी सोपवली आहे. स्थानिक मक्तेदार दत्तात्रय कदम यांना यांच्याकडे हे काम देण्यात आले आहे.
कोव्हिड-१९ प्रतिबंधात्मक उपायोजना करीत असताना इलेक्ट्रिक विद्युत दाहिनीची सोय उपलब्ध करण्यासाठी बालाजी अमाईन्स कंपनीच्या माध्यमातून कंपनीच्या सामाजिक दायित्व (सीएसआर) निधीतून सोलापूर महापालिकेच्या रुपाभवानी स्मशानभूमी येथे अत्याधुनिक विद्युत दाहिनी बसविणे व आजूबाजुचा परिसर विकसित करण्यासाठी सुमारे 1 कोटी 27 लाख रुपयाचा निधी उपलब्ध करुन दिला. या निधीतून रूपा भवानी स्मशानभूमीत
विद्युत दाहिनी, श्रध्दांजली सभागृह / वेटिंग हॉल (१४मी. x १२मी.), पुरुष व महिला यांच्यासाठी २ स्वतंत्र स्वच्छता गृह युनिट व हातपाय धुण्याकरिता स्वतंत्र हँडवॉश सेंटर,
विद्युत दाहिनी परिसरास पूर्ण बंदीस्त करण्यासाठी चेनलिंक फेन्सिग व गेट, विद्युत दाहिनी परिसरात छोटे उद्यान, वृक्षारोपण,
अंत्यविधीस उपस्थित नागरिकांना बसण्याकरिता मार्बलचे १७ बाकडे, पूर्ण परिसरास रंगरंगोटी व लाईट फिटींग्ज गुणवत्तापूर्ण, नेटक्या पद्धतीने पूर्ण करून देण्यात आली. बालाजी अमाईन्स कंपनीच्या सामाजिक दायित्व निधीतून (सीएसआर) हे मोठे काम शहरवासीयांच्या मदतीसाठी महापालिकेस मोलाचे सहकार्य केले.
दरम्यान, बालाजी अमाईन्स कंपनीच्या वतीने येथील विद्युत दाहिनी व सर्व परिसराचे दि. 26 जानेवारी 2022 रोजी लोकार्पण करण्यात आले. महापालिकेकडे हस्तांतरित करण्यात आले. बालाजी अमाईन्स कंपनीच्या वतीने विद्युत दाहिनी देखभाल दुरुस्तीचा मक्ता दोन वर्षासाठी मनीष इटरप्राईजेस या मक्तेदाराला देण्यात आला. तसा दोन वर्षाचा करारही करण्यात आला. दरम्यानच्या काळात या देखभाल दुरुस्ती मक्ता कराराची दोन वर्षाची मुदत दि. 5 जानेवारी 2024 रोजी संपली आहे. त्यानंतर महापालिका प्रशासनाच्या वतीने येथील विद्युत दाहिनीची देखभाल दुरुस्ती करावयाची आहे मात्र मागील महिन्यात येथील विद्युत दाहिनी तांत्रिक बिघाडामुळे बंद पडली होती.
विद्युतदाहिनी पूर्ववत सुरू
केली : संदिप कारंजे
रूपा भवानी स्मशानभूमीतील विद्युत दाहिनीच्या तांत्रिक दुरुस्तीचे काम पूर्ण झाले आहे. त्यानंतर विद्युत दाहिनी पूर्ववत सुरू करण्यात आली आहे. देखभाल दुरुस्ती करण्यासाठी एका मक्तेदारावर जबाबदारी सोपवण्यात आली आहे. यामुळे यापुढे कोणतीही गैरसोय होणार नाही, असे महापालिका अतिरिक्त आयुक्त संदीप कारंजे यांनी सांगितले.
उद्योजक केतन वोरा यांनी मानले महापालिकेचे आभार
रूपा भवानी स्मशानभूमीतील विद्युत दाहिनी बंद पडली होती. यामुळे नागरिकांची गैरसोय होत असल्याने विद्युत दाहिनी मक्तेदार नेमून दुरुस्त करून घ्यावी अशी मागणी केली होती. या प्रश्नाकडे लक्ष वेधले होते. अखेर महापालिका प्रशासनाने दुरुस्तीचे काम पूर्ण केले आणि ही विद्युत दाहिनी सुरू झाली आहे. मक्तेदारही नेमला आहे. कार्यवाही झाल्याने समाधान वाटले. नागरिकांची गैरसोय टळली, असे सांगत उद्योजक केतन वोरा यांनी महापालिका प्रशासनाचे आभार मानले.
———-
