‘शहर मध्य’मधून भाजपचे देवेंद्र कोठे उमेदवार? ; फेसबुक वरील ती पोस्ट ठरतेय चर्चेची
सोलापूर : सोलापूर जिल्ह्यातील शहर मध्य या मतदारसंघासाठी सध्या शिवसेना की भाजप ही जागा कोणाला सुटणार यासाठी चुरस असल्याचे माहिती समोर आले आहे. जागा वाटपामध्ये ॲडजस्टमेंट करून शहर मध्य भाजप घेणार असल्याची ही चर्चा असून या शहर मध्य साठी भाजपकडून माजी नगरसेवक देवेंद्र कोठे यांना उमेदवारी मिळणार असल्याचेही आता जोरदार चर्चा ऐकण्यास मिळत आहे.
भारतीय जनता पार्टीची 99 उमेदवारांची पहिली यादी जाहीर झाली. त्यामध्ये विद्यमान तीन आमदारांना उमेदवारी देण्यात आली आहे. शहर मध्य साठी मात्र एकनाथ शिंदे गटाच्या शिवसेनेने जोर लावला आहे. या ठिकाणी जिल्हा संपर्कप्रमुख शिवाजीराव सावंत, जिल्हा प्रमुख मनीष काळजे, राज्याच्या प्रवक्त्या ज्योती वाघमारे हे इच्छुक आहेत. या तिघांपैकी काळजे आणि वाघमारे हे स्थानिक मध्य मधील रहिवासी असल्याने त्यांनी हा मतदारसंघ आपणाला सुटावा यासाठी मुख्यमंत्री एकनाथ शिंदे यांच्या कडे ठिय्या मांडल्याचे बोलले जात आहे.
हा मतदारसंघ भारतीय जनता पार्टीला सुटला तर शिवसेनेचे शहरात अस्तित्व राहणार नाही या भूमिकेत काळजे आणि वाघमारे आहेत.
लोकसभा निवडणुकीदरम्यान देवेंद्र कोठे यांनी भारतीय जनता पार्टी प्रवेश केला. त्यानंतर त्यांच्यावर शहर मध्यची जबाबदारी देण्यात आली होती ही जबाबदारी प्रामाणिकपणे पार पडताना कोठे यांनी खासदार प्रणिती शिंदे यांना मध्य मध्ये मताधिक्यापासून रोखण्यात यश मिळवले.
देवेंद्र कोठे हे तेव्हापासून शहर मध्यचे उमेदवार राहतील अशी चर्चा असून त्यासाठी त्यांनी मागील चार महिन्यात या मतदारसंघात महासेवा शिबिराच्या माध्यमातून आपली जोरदार मोर्चे बांधणी केली आहे.
देवेंद्र फडणवीस यांनी कोठे यांचे पालकत्व स्वीकारल्याने त्या शब्दाची उतराई फडणवीस हे कोठे यांना उमेदवारी देऊन करणार का? याकडेही सर्वांचे लक्ष आहे तसेच कोठे यांची उमेदवारी जवळजवळ फायनल झाली असल्याचे समजल्याने भारतीय जनता पार्टीतील माजी नगरसेवकांनी त्यांच्या उमेदवारीला काही दिवसांपूर्वी पत्र पाठवून विरोध केल्याचे सुद्धा पाहायला मिळाले आहे.
